Sparnaðartillögur á kostnað atvinnulausra
10. september 2025Sparnaðartillögur á kostnað atvinnulausra
Ríkisstjórnin hyggst stytta bótatímabil atvinnuleysistrygginga úr 30 mánuðum í 18 mánuði og herða ávinnsluskilyrði. Áætlað er að skerðingin skili sex milljörðum króna í sparnað á ári.
Forsvarsmenn verkalýðshreyfingarinnar benda á að atvinnuþátttaka sé þegar með því mesta innan OECD og atvinnuleysi lágt. Engin knýjandi þörf sé því á að draga úr réttindum launafólks. Þvert á móti þurfi að efla úrræði sem styðja fólk í atvinnuleit, ekki veikja afkomuöryggi þeirra sem lenda í atvinnuleysi.
Breytingarnar eru sagðar sparnaðartillögur í dulargervi, teknar einhliða án samráðs við aðila vinnumarkaðarins. Verkefnið sem áður var unnið í sameiningu með fulltrúum launafólks og atvinnurekenda er lagt til hliðar.
ASÍ og BSRB fordæma þessi áform og lýsa yfir að verkalýðshreyfingin muni ekki sitja hjá þegar grundvallarréttindi launafólks eru skert.